جڑواں شہروں میں شدید بارش، رین ایمرجنسی نافذ، نالہ لئی میں پانی کی سطح بلند

اسلام آباد اور راولپنڈی کے مختلف علاقوں میں موسلادھار بارش کے باعث نشیبی علاقے زیر آب آ گئے ہیں، جبکہ نالہ لئی میں پانی کا بہاؤ پری الرٹ سطح تک پہنچ گیا ہے۔ کسی بھی ناگوار اور ہنگامی صورتحال سے نمٹنے کے لیے ضلعی انتظامیہ نے شہر میں رین ایمرجنسی نافذ کر دی ہے۔ضلعی انتظامیہ کی رپورٹ کے مطابق نالہ لئی میں کٹاریاں کے مقام پر پانی کا بہاؤ 9 فٹ اور گوالمنڈی کے مقام پر 11 فٹ ریکارڈ کیا گیا ہے۔ بارش کی شرح کا جائزہ لیا جائے تو راولپنڈی کے علاقے شمس آباد میں سب سے زیادہ 116 ملی میٹر بارش ریکارڈ کی گئی ہے۔بارش کی شدت کے باعث مری روڈ سمیت اہم شاہراہوں اور نشیبی علاقوں میں بارشی پانی جمع ہو گیا، جس سے شہریوں کو آمدورفت میں مشکلات کا سامنا کرنا پڑا۔ صورتحال پر قابو پانے کے لیے واسا (WASA) کی ٹیموں نے فوری طور پر ڈی واٹرنگ آپریشن کا آغاز کر دیا ہے اور بھاری مشینری کے ذریعے پانی کی نکاسی کا کام جاری ہے۔ دوسری جانب محکمہ موسمیات نے خبردار کیا ہے کہ مون سون کا یہ چھٹا سپیل 21 اگست تک جاری رہے گا۔ اس دوران آزاد کشمیر، گلگت بلتستان، پنجاب اور خیبر پختونخوا کے مختلف اضلاع میں مزید گرج چمک کے ساتھ بارش کا امکان ظاہر کیا گیا ہے۔