’’بلند و بالا پہاڑوں کی سرزمین‘‘، پاکستان دنیا کے منفرد سیاحتی مقامات کی فہرست میں شامل

برطانیہ کے نامور اخبار ’دی ٹیلی گراف‘ نے پاکستان کو دنیا کے ان گنے چنے اور منفرد ترین سیاحتی مقامات میں شامل کیا ہے جو برف پوش پہاڑوں، پرسکون وادیوں، قدیم تہذیب اور مہم جوئی کا سحر انگیز امتزاج پیش کرتے ہیں۔ معروف ٹریول رائٹرز بینیڈکٹ ایلن اور سارہ مارشل کے تحریر کردہ اس ٹریول فیچر میں شمالی پاکستان کے قدرتی مناظر، وادی ہنزہ، بلند و بالا گلیشیئرز اور شاہراہِ قراقرم کی انجینئرنگ کو خصوصی طور پر سراہا گیا ہے۔ اخبار نے پاکستان کی تاریخ و ثقافت بشمول 17ویں صدی کی بادشاہی مسجد اور وادیٔ سندھ کی قدیم تہذیب کے ساتھ ساتھ مقامی لوگوں کی روایتی مہمان نوازی کی بھی تعریف کی۔ اس فہرست میں پاکستان کے علاوہ ترکمانستان، گیبون، انگولا، آرمینیا اور جمہوریہ کانگو جیسے ممالک بھی شامل ہیں۔