کیش لیس اکانومی پر وزیراعظم نے اعلیٰ سطح کمیٹی قائم کر دی: عطا تارڑ

وفاقی وزیرِ اطلاعات عطا تارڑ نے کہا ہے کہ وزیراعظم شہباز شریف نے ملک میں کیش لیس اکانومی (ڈیجیٹل معیشت) کے فروغ کے لیے ایک اعلیٰ سطح کمیٹی قائم کر دی ہے۔ اسلام آباد میں میڈیا سے گفتگو کرتے ہوئے عطا تارڑ کا کہنا تھا کہ وزیراعظم شہباز شریف ٹیکنالوجی اور مالیاتی خدمات کے انضمام پر پختہ یقین رکھتے ہیں اور انہوں نے بطور وزیراعلیٰ پنجاب بھی ٹیکنالوجی اور مالیاتی شمولیت کے لیے انقلابی اقدامات کیے تھے۔ وفاقی وزیر نے یاد دہانی کرائی کہ پنجاب میں سرکاری سطح کی پہلی ویڈیو کانفرنسنگ سروس متعارف کرائی گئی تھی جبکہ ماضی میں شدید تنقید کا نشانہ بننے والی لیپ ٹاپ اسکیم نے کورونا وبا کے دوران آن لائن تعلیم اور گھروں سے کام کرنے کے حوالے سے کلیدی کردار ادا کیا۔ انہوں نے واضح کیا کہ موجودہ حکومت ٹیکنالوجی کے فروغ کو شفافیت اور کارکردگی میں اضافے کا بنیادی ذریعہ سمجھتی ہے۔