خیبرپختونخوا: جعلی و ملاوٹ شدہ ادویات کی فروخت پر سزائیں مزید سخت کرنے کا فیصلہ

خیبرپختونخوا حکومت نے صوبے میں جعلی، ملاوٹ شدہ اور غیر قانونی ادویات کی روک تھام کے لیے ڈرگ ایکٹ میں سخت ترمیم کا فیصلہ کرتے ہوئے ‘خیبرپختونخوا ڈرگ ترمیمی بل 2026’ صوبائی اسمبلی میں پیش کر دیا ہے۔ مجوزہ بل کے تحت غیر رجسٹرڈ اور بغیر لائسنس ادویات کی فروخت پر 10 سال قید اور ایک کروڑ روپے جرمانے کی شدید سزا تجویز کی گئی ہے، جبکہ جعلی و ملاوٹ شدہ ادویات پر 7 سال قید اور 50 لاکھ روپے جرمانہ ہوگا۔ اس کے علاوہ غلط نام سے دوا فروخت کرنے پر 10 سال قید اور ڈیڑھ کروڑ روپے، جبکہ سزا کے بعد بھی غیر رجسٹرڈ ادویات کی فروخت جاری رکھنے پر 2 کروڑ روپے جرمانہ عائد کیا جائے گا۔ بل میں ڈرگ انسپکٹر کے کام میں رکاوٹ ڈالنے اور کوالٹی رولز کی خلاف ورزی پر بھی بھاری جرمانے اور قید کی سزائیں شامل کی گئی ہیں، نیز معیاری ٹیسٹنگ کے لیے ادویات بیرونِ ملک لیبارٹریز بھیجنے اور خصوصی ڈرگ چیئرمین کا عہدہ ہائیکورٹ کے جج کے برابر رکھنے کی تجویز دی گئی ہے۔