سابق فوجی افسران و جوانوں کا تجربہ و رہنمائی ادارہ جاتی اثاثہ ہے: فیلڈ مارشل

یومِ آزادی کے پرمسرت موقع پر آرمی چیف جنرل سید عاصم منیر نے سابق فوجیوں کے اعزاز میں ایک پروقار استقبالیے کا اہتمام کیا، جس میں ریٹائرڈ افسران اور جوانوں کی بڑی تعداد نے شرکت کی۔ پاک فوج کے شعبہ تعلقات عامہ (آئی ایس پی آر) کے مطابق سپہ سالار نے ملکی دفاع، قومی سلامتی اور استقامت کو مضبوط بنانے کے لیے سابق فوجیوں کی گراں قدر خدمات کو سراہتے ہوئے ان کے تجربے اور رہنمائی کو پاک فوج کا قیمتی اثاثہ قرار دیا۔ اس موقع پر سابق فوجیوں نے بھی پاک فوج کی قیادت پر کامل اعتماد کا اظہار کرتے ہوئے ابھرتے ہوئے سکیورٹی چیلنجز سے نمٹنے اور قومی اتحاد، امن و استحکام کے لیے اپنا بھرپور کردار جاری رکھنے کے عزم کا اعادہ کیا۔