پاکستان کی معیشت استحکام کی جانب گامزن، ترسیلات زر 41 ارب ڈالر سے تجاوز کر گئیں: گورنر اسٹیٹ بینک جمیل احمد

گورنر اسٹیٹ بینک آف پاکستان جمیل احمد نے کہا ہے کہ پاکستان کی معیشت نے گزشتہ ایک سال کے دوران استحکام کی جانب اہم پیشرفت کی ہے، جبکہ مؤثر مالی و زری پالیسیوں اور بہتر بیرونی کھاتوں کے باعث معیشت کی بنیادیں مزید مضبوط ہوئی ہیں۔ ان کا کہنا تھا کہ معاشی استحکام کے بعد ملک بتدریج پائیدار ترقی کی جانب گامزن ہے جس سے معاشی سرگرمیوں میں تیزی آ رہی ہے اور مستقبل میں سرمایہ کاری اور روزگار کے مزید مواقع پیدا ہوں گے۔ مالی سال 2026 کے اعداد و شمار کا ذکر کرتے ہوئے انہوں نے بتایا کہ گزشتہ مالی سال کے دوران مہنگائی کی شرح 7.1 فیصد رہی جبکہ معاشی نمو (جی ڈی پی گروتھ) 3.7 فیصد ریکارڈ کی گئی۔ اسٹیٹ بینک درمیانی مدت میں مہنگائی کو 5 سے 7 فیصد کے ہدف کے اندر رکھنے کے لیے تمام ممکنہ اقدامات کر رہا ہے، جبکہ رواں مالی سال 2027 میں معاشی نمو 3.5 سے 4.5 فیصد کے درمیان رہنے کی توقع ہے۔

گورنر اسٹیٹ بینک نے بیرونی شعبے کی کارکردگی کا احاطہ کرتے ہوئے بتایا کہ مالی سال 2026 میں بیرون ملک مقیم پاکستانیوں کی جانب سے بھیجی جانے والی ترسیلات زر ریکارڈ سطح پر پہنچ کر 41 ارب ڈالر سے تجاوز کر گئیں، اور امید ہے کہ رواں مالی سال ترسیلات زر کا یہ حجم 44 ارب ڈالر سے بڑھ جائے گا۔ اس کے علاوہ مالی سال 2026 کے اختتام پر پاکستان کے زرمبادلہ کے کل ذخائر 18.4 ارب ڈالر تک پہنچ چکے ہیں اور توقع ظاہر کی جا رہی ہے کہ رواں مالی سال کے دوران زرمبادلہ کے ذخائر 21 ارب ڈالر کی حد عبور کر جائیں گے۔