فیلڈ مارشل کی شہدا کے اہل خانہ سے ملاقات، سروں پر دست شفقت رکھا

‘یادگارِ فتح’ کی پروقار افتتاحی تقریب کے موقع پر ایک انتہائی جذباتی اور متاثر کن مناظر دیکھنے میں آئے، جہاں صدرِ مملکت، وزیراعظم پاکستان اور فیلڈ مارشل سید عاصم منیر شہدا اور غازیوں کے اہلخانہ کے درمیان گھل مل گئے۔ تقریب کے دوران عسکری اور وفاقی قیادت نے معرکہِ حق کے عظیم شہدا کے لواحقین اور غازیوں کی بے مثال ثابت قدمی، جذبے اور ملک و ملت کے لیے دی گئی عظیم الشان قربانیوں کو زبردست الفاظ میں خراجِ تحسین پیش کیا۔

اس موقع پر فیلڈ مارشل سید عاصم منیر نے شہدا کے بچوں اور لواحقین کے سروں پر دستِ شفقت رکھا اور ان سے خصوصی گفتگو کی۔ فیلڈ مارشل نے واضح اور دلی الفاظ میں کہا کہ “شہدا ہمارا فخر اور ہمارے ماتھے کا جھومر ہیں، جن کی قربانیاں قوم کی بقا اور سلامتی کی ضمانت ہیں۔” ملکی کی اعلیٰ ترین سیاسی و عسکری قیادت کی شہدا کے اہلخانہ سے یہ خصوصی اور محبت بھری ملاقات اس عزم کا اعادہ ہے کہ پاکستانی قوم ہر موڑ اور ہر موقع پر اپنے ان عظیم ہیروز کی قربانیوں کو پوری عزت و احترام کے ساتھ یاد رکھتی ہے۔