حکومتی ہدف سے تقریباً 100 ارب روپے زیادہ پیٹرولیم لیوی وصول

مالی سال 26-2025 کے دوران ملک میں پیٹرولیم لیوی کی مد میں وصولیاں تاریخ کی بلند ترین سطح پر پہنچتے ہوئے ریکارڈ 1567 ارب 45 کروڑ روپے درج کی گئی ہیں۔ ذرائع کے مطابق یہ وصولی حکومت پاکستان کے مقررہ ہدف کے ساتھ ساتھ عالمی مالیاتی فنڈ (آئی ایم ایف) کے لگائے گئے تخمینے سے بھی نمایاں طور پر زیادہ رہی ہے۔ اس کے علاوہ ‘کلائمیٹ سپورٹ لیوی’ کی مد میں 50 ارب 16 کروڑ روپے کی رقم الگ سے وصول کی گئی ہے۔

رپورٹ کے مطابق مالی سال 26-2025 کے دوران پیٹرولیم لیوی کی وصولی میں گزشتہ برس کے مقابلے میں 347 ارب 24 کروڑ روپے کا بھاری اضافہ دیکھا گیا، جو کہ 1468 ارب روپے کے سرکاری ہدف سے تقریباً 100 ارب روپے زیادہ ہے۔ اسی طرح یہ وصولی آئی ایم ایف کے 1546 ارب روپے کے تخمینے سے بھی 21 ارب روپے زائد رہی۔ یاد رہے کہ مالی سال 25-2024 میں لیوی وصولی 1220 ارب 21 کروڑ روپے، مالی سال 24-2023 میں 1019 ارب روپے اور مالی سال 23-2022 میں صرف 580 ارب روپے تھی۔ ذرائع کے مطابق اس وقت ملک میں پیٹرول پر 80 روپے فی لیٹر اور ہائی اسپیڈ ڈیزل پر 77 روپے 28 پیسے فی لیٹر کے حساب سے لیوی وصول کی جا رہی ہے، جبکہ دونوں فیول پر 5، 5 روپے فی لیٹر کلائمیٹ سپورٹ لیوی اضافی طور پر عائد ہے۔