یومِ آزادی ہمارے لئے خوشی، شکرگزاری، فخر اور عزم کی تجدید کا دن ہے: احسن اقبال

وفاقی وزیر برائے منصوبہ بندی، ترقی و اصلاحات پروفیسر احسن اقبال نے یومِ آزادی کے پرمسرت موقع پر اپنے پیغام میں کہا ہے کہ 14 اگست کا دن تمام پاکستانیوں کے لیے خوشی، شکرگزاری، فخر اور عزم کی تجدید کا دن ہے۔ انہوں نے کہا کہ آج کا دن اللہ تعالیٰ کا شکر ادا کرنے اور قومی کامیابیوں کا جشن منانے کا موقع ہے، اور ہم معرکہ حق میں کامیابیوں پر ربِ کریم کے حضور شکر بجا لاتے ہوئے یہ دن منا رہے ہیں۔ وفاقی وزیر نے اس بات پر زور دیا کہ سرحدوں کی حفاظت کے ساتھ ساتھ اب بحیثیت قوم ہمیں معرکۂ معیشت میں بھی پاکستان کا لوہا منوانا ہوگا، اور ملک کی ترقی، خوشحالی اور معاشی خودمختاری کے لیے پوری قوم کو متحد ہو کر آگے بڑھنا ہوگا۔

پروفیسر احسن اقبال نے بانی پاکستان قائد اعظم محمد علی جناحؒ اور مفکرِ پاکستان علامہ محمد اقبالؒ کو ان کی عظیم جدوجہد، بصیرت اور قربانیوں پر زبردست خراجِ عقیدت پیش کیا۔ انہوں نے کہا کہ قائد کے دیے گئے زریں اصولوں—اتحاد، ایمان اور تنظیم—کو ہمیں اپنی قومی زندگی کا عملی حصہ بنانا ہوگا اور عہد کرنا ہوگا کہ ہم پاکستان کو ایک مضبوط، خوشحال، خودمختار اور ترقی یافتہ ملک بنانے کے لیے اپنی تمام تر صلاحیتیں بروئے کار لائیں گے۔ انہوں نے واضح کیا کہ آزادی کا تحفظ صرف جغرافیائی سرحدوں تک محدود نہیں ہوتا بلکہ معاشی، علمی، سائنسی اور ٹیکنالوجی کے میدانوں میں نمایاں کامیابی حاصل کرنا بھی آزادی کو برقرار رکھنے کے لیے ضروری ہے۔