بادامی باغ میں نامعلوم موٹرسائیکل سواروں کی فائرنگ، 2 پولیس اہلکار شہید

لاہور کے علاقے بادامی باغ کی حدود میں نامعلوم موٹر سائیکل سواروں نے فائرنگ کر کے لاری اڈا پولیس اسٹیشن میں تعینات دو پولیس اہلکاروں کو شہید کر دیا۔ پولیس کے مطابق فائرنگ سے شہید ہونے والوں میں سب انسپکٹر عدیل اور کانسٹیبل اسد شامل ہیں۔

ابتدائی تحقیقات سے معلوم ہوا ہے کہ سب انسپکٹر عدیل نے کچھ عرصہ قبل ایک پولیس مقابلے میں خطرناک شوٹر فیضان بٹ کو ہلاک کیا تھا، جس کا بھائی ریحان بٹ بھی نامی گرامی شوٹر ہے اور پولیس کو مطلوب ہے۔ پولیس کے مطابق ریحان بٹ نے اپنے بھائی کی ہلاکت کی رنجش میں سب انسپکٹر عدیل اور ان کے ساتھ موجود کانسٹیبل اسد کو نشانہ بنایا۔

واقعے کے فوراً بعد پولیس اور فرانزک ٹیموں نے جائے وقوعہ پر پہنچ کر تمام تر شواہد اکٹھے کر لیے ہیں، جبکہ دونوں شہید اہلکاروں کی میتوں کو پوسٹ مارٹم کے لیے مردہ خانے منتقل کر دیا گیا ہے۔ پولیس نے ملزم ریحان بٹ کی گرفتاری کے لیے کارروائیاں شروع کر دی ہیں۔