اسحاق ڈار سے صدر ن لیگ آزاد کشمیر کی ملاقات، حکومت سازی سے متعلق امور پر گفتگو

ڈپٹی وزیراعظم و وزیرِ خارجہ سینیٹر اسحاق ڈار سے مسلم لیگ (ن) آزاد کشمیر کے صدر شاہ غلام قادر نے اسلام آباد میں ملاقات کی، جس میں آزاد کشمیر کی موجودہ سیاسی صورتحال اور حکومت سازی کے امور پر تفصیلی تبادلہ خیال کیا گیا۔ ملاقات میں خطے کی تعمیر و ترقی، عوامی مسائل کے حل اور انتخابی نتائج پر روشنی ڈالی گئی۔

شاہ غلام قادر نے ڈپٹی وزیراعظم کو آزاد کشمیر کے عام انتخابات میں مسلم لیگ (ن) کی انتخابی کارکردگی اور کامیابی کے حوالے سے آگاہ کرتے ہوئے کہا کہ عوام نے نواز شریف، شہباز شریف اور مریم نواز کی قیادت اور بالخصوص پنجاب کے ترقیاتی ماڈل پر اعتماد کا اظہار کیا ہے۔ سینیٹر اسحاق ڈار نے مسلم لیگ (ن) کی انتخابی کامیابی کو سراہتے ہوئے کہا کہ یہ نتائج عوام کے اعتماد کا عکاس ہیں، جبکہ مسلم لیگ (ن) آزاد کشمیر کے عوام کی بہتری اور بنیادی ترجیحات کے لیے اپنا بھرپور کردار ادا کرتی رہے گی۔