منشیات کیس: عدالت نے ملزمہ انمول عرف پنکی کو بری کر دیا

کراچی کی ایڈیشنل ڈسٹرکٹ اینڈ سیشن عدالت (جنوبی) نے تھانہ گزری میں درج منشیات کے ایک مقدمے کی سماعت کرتے ہوئے ملزمہ انمول عرف پنکی کی بریت کی درخواست منظور کر لی ہے اور انہیں کیس سے بری کرنے کا حکم جاری کر دیا ہے۔

عدالت میں ملزمہ کی وکیل انعم کوثر ایڈووکیٹ نے موقف اختیار کیا کہ ان کی موکلہ کے خلاف سال 2021ء میں تھانہ گزری میں منشیات کا مقدمہ درج کیا گیا تھا جس میں وہ مفرور چلی آ رہی تھیں۔ وکیل صفائی نے دلائل دیتے ہوئے کہا کہ ملزمہ کو کسی براہِ راست ثبوت کے بغیر صرف شریک ملزمان کے بیانات کی بنیاد پر مقدمے میں نامزد کیا گیا تھا، جبکہ کیس کے دیگر دو اہم شریک ملزمان علی اور فہمیدہ کو عدالت سال 2024ء میں پہلے ہی بری کر چکی ہے۔ صفائی کے وکلاء کے مطابق بنیادی ملزمان کے بری ہونے کے بعد اب انمول عرف پنکی کو اس مقدمے میں سزا ملنے کا کوئی قانونی جواز یا امکان باقی نہیں رہتا۔ عدالت نے وکلاء کے دلائل سے اتفاق کرتے ہوئے ملزمہ کی بریت کی درخواست منظور کر لی۔