ٹرمپ انتظامیہ نے رواں سال 85 ہزار امریکی ویزے منسوخ کر دیے، سخت اسکریننگ پالیسیوں کا نفاذ

واشنگٹن: ٹرمپ انتظامیہ نے جنوری سے اب تک 85 ہزار امریکی ویزے منسوخ کر دیے، جو گزشتہ سال کے مقابلے میں دوگنا ہیں۔ محکمہ خارجہ کے مطابق منسوخ شدہ ویزوں میں 8 ہزار سے زائد اسٹوڈنٹ ویزے بھی شامل ہیں۔

محکمہ خارجہ کا کہنا ہے کہ DUI، اسالٹ اور چوری جیسے جرائم ویزہ منسوخی کی نصف وجوہات ہیں، جبکہ باقی کیسز میں ویزہ ایکسپائری، سیکیورٹی خدشات اور مبینہ دہشت گردی کی حمایت جیسے عوامل شامل رہے۔

رپورٹ کے مطابق ٹرمپ انتظامیہ نے بیرونِ ملک آنے والے افراد اور امریکہ میں موجود تارکین وطن کے لیے “کنٹینیوس ویٹنگ” کا نیا نظام نافذ کیا ہے جو 55 ملین ویزہ ہولڈرز کی مسلسل نگرانی کرتا ہے۔

اس دوران بین الاقوامی طلبہ پر خاص سختی کی گئی ہے۔ حکام کے مطابق غزہ جنگ کے خلاف احتجاج میں شریک طلبہ پر “یہودی مخالف رویے” اور “دہشت گردی کی حمایت” کے الزامات لگا کر متعدد اسٹوڈنٹس کے ویزے منسوخ کیے گئے۔

اسی پالیسی کے تحت H-1B درخواست گزاروں کی نگرانی بھی بڑھا دی گئی ہے، اور کانٹینٹ ماڈریشن یا فیکٹ چیکنگ سے وابستہ افراد کو بھی اضافی جانچ کا سامنا ہے۔ اسٹوڈنٹ ویزوں میں اب سوشل میڈیا پروفائلز کو لازمی طور پر پبلک رکھنے کی شرط بھی شامل ہے۔

ادھر ہوم لینڈ سیکیورٹی نے بھی ڈی پورٹیشن مہم تیز کر دی ہے، جبکہ سابقہ دور میں آنے والے تمام مہاجرین کی نئی اسیسمنٹ جاری ہے۔ مزید یہ کہ امریکہ نے 19 ممالک پر سفری پابندیوں کے بعد مزید 30 سے زائد ممالک کو فہرست میں شامل کرنے پر غور شروع کر دیا ہے۔