پنجاب میں دریاؤں کی صورتحال بہتر، مون سون بارشوں کا الرٹ جاری

پنجاب ڈیزاسٹر مینجمنٹ اتھارٹی (PDMA) کے ترجمان کے مطابق صوبے کے بیشتر دریاؤں میں پانی کا بہاؤ معمول پر آ گیا ہے، تاہم 5 اگست 2026 تک مون سون بارشوں کے چوتھے سلسلے کی موجودگی کے باعث فلیش فلڈنگ، اربن فلڈنگ اور لینڈ سلائیڈنگ کا خدشہ برقرار ہے۔ ترجمان کے مطابق دریائے چناب، راوی، جہلم اور ستلج کے تمام بیراجوں پر صورتحال نارمل ہے، جبکہ دریائے سندھ میں کالاباغ کے مقام پر نچلے درجے کا سیلاب ریکارڈ کیا گیا ہے جہاں پانی کی آمد 331,000 کیوسک اور اخراج 323,000 کیوسک ہے۔ وزیرآباد کے نالہ پلکھو میں درمیانے درجے اور نالہ ایک و بئیں میں نچلے درجے کا سیلاب ہے۔ ڈی جی پی ڈی ایم اے عرفان علی جپہ نے لاہور، راولپنڈی، سیالکوٹ، گوجرانوالہ، گجرات، فیصل آباد اور ملتان میں اربن فلڈنگ جبکہ مری اور گلیات میں لینڈ سلائیڈنگ کے خطرے کے پیش نظر شہریوں کو ندیاں، نالے اور دریا پار کرنے سے گریز کرنے کی سخت ہدایت کی ہے۔