آزاد کشمیر الیکشن: ن لیگ نے 8 نشستیں جیت کر میدان مار لیا، پیپلزپارٹی 4 پرکامیاب

آزاد جموں و کشمیر قانون ساز اسمبلی انتخابات کے پہلے مرحلے میں میرپور ڈویژن کی 13 نشستوں کے غیر حتمی و غیر سرکاری نتائج کے مطابق پاکستان مسلم لیگ (ن) نے شاندار کامیابی حاصل کرتے ہوئے 8 نشستوں پر میدان مار لیا، جبکہ پاکستان پیپلز پارٹی 4 نشستیں حاصل کر سکی۔ انتخاب کے دوران کئی بڑے اپ سیٹ دیکھنے کو ملے؛ سابق وزیراعظم چودھری انوار الحق (ایل اے 7 بھمبر) ن لیگ کے چودھری طارق فاروق سے شکست کھا گئے، جبکہ پیپلز پارٹی کے صدر چودھری محمد یاسین اپنے آبائی حلقے (ایل اے 12 چڑہوئی) سے ن لیگ کے راجہ ریاست خان سے ہار گئے، تاہم انہوں نے ایل اے 10 کوٹلی سٹی سے کامیابی حاصل کر لی۔ اس کے علاوہ پی پی پی کے سینئر رہنما جاوید اقبال بڈھانوی (ایل اے 9 نکیال) اور ولید انقلابی (ایل اے 13 کھوئی رٹہ) بھی اپنی نشستیں نہ بچا سکے۔ چیف الیکشن کمشنر جسٹس (ر) غلام مصطفیٰ مغل نے انتخابی عمل کو آزادانہ اور شفاف قرار دیتے ہوئے قانون نافذ کرنے والے اداروں کے کردار کو سراہا۔