چناب اور راوی میں طغیانی، کئی دیہات زیر آب، ہزاروں ایکڑ پر فصلیں متاثر

دریائے چناب اور دریائے راوی میں طغیانی کے باعث پنجاب کے مختلف علاقوں میں سیلابی صورتحال پیدا ہو گئی ہے، جہاں علی پور چٹھہ کے علاقے کوٹ بیلہ اور ترنڈہ محمد پناہ کے مقام پر حفاظتی بند ٹوٹنے سے ہزاروں ایکڑ زرعی اراضی اور درجنوں مکانات شدید متاثر ہوئے ہیں۔ محکمہ انہار کے مطابق عبدالحکیم میں ہیڈ سدھنائی کے مقام پر دریائے راوی میں پانی کی آمد 53,530 کیوسک جبکہ اخراج 38,230 کیوسک ریکارڈ کیا گیا ہے۔ انتظامیہ نے متاثرہ علاقوں مل فتیانہ، کوٹ پٹھانہ اور حویلی مائی صفوراں سمیت متعدد مقامات پر فلڈ ریلیف کیمپس قائم کر کے بھاری مشینری کے ذریعے امدادی کارروائیاں اور بندوں کی مرمت کا کام تیز کر دیا ہے، جبکہ ساحلی پٹی پر مقیم شہریوں کو محفوظ مقامات پر منتقل ہونے کی ہدایات جاری کی گئی ہیں۔