پاکستان سمندری اثاثوں کے دفاع کے لیے طاقت کے استعمال کا حق محفوظ رکھتا ہے: دفتر خارجہ

وزارتِ خارجہ نے حوثیوں کی جانب سے تجارتی بحری جہازوں پر حملوں اور دھمکیوں کی شدید الفاظ میں مذمت کرتے ہوئے واضح کیا ہے کہ پاکستانی پرچم بردار جہازوں کے خلاف کسی بھی قسم کی کارروائی کو قومی سلامتی کا خطرہ تصور کیا جائے گا اور پاکستان اپنے دفاع کا کامل حق رکھتا ہے۔

دفترِ خارجہ کے ترجمان طاہر حسین اندرابی نے ہفتہ وار نیوز بریفنگ کے دوران بتایا کہ حوثیوں کی جانب سے سعودی کمرشل جہازوں کو دھمکیاں دینے اور بحری جہازوں پر حملوں کی اطلاعات پر پاکستان کو شدید تشویش ہے۔ انہوں نے کہا کہ سعودی عرب کے ساتھ جائز تجارتی سرگرمیوں کو نشانہ بنانا یا اس کے خلاف دھمکیاں دینا کسی صورت قابلِ قبول نہیں ہے۔

ترجمان نے دو ٹوک الفاظ میں خبردار کیا کہ پاکستانی پرچم بردار جہازوں یا بحری مفادات کے خلاف کوئی بھی جارحانہ اقدام پاکستان کی خودمختاری اور قومی سلامتی کے لیے سنگین خطرہ سمجھا جائے گا۔ طاہر حسین اندرابی کا مزید کہنا تھا کہ اقوامِ متحدہ کے بین الاقوامی قوانین کے مطابق پاکستان اپنے سمندری اثاثوں، تجارتی راستوں اور ساحلی مفادات کے تحفظ کے لیے طاقت کے استعمال کا پورا حق محفوظ رکھتا ہے۔