پاکستانی چاول کی مانگ میں اضافہ، میٹرک ٹن کے نئے آرڈر موصول

پاکستانی چاول کی عالمی مارکیٹ میں مانگ اور برآمدات میں اضافے کا سلسلہ مسلسل جاری ہے، جس کے تحت چین کی جانب سے پاکستان کو 60 ہزار میٹرک ٹن چاول کے مزید نئے برآمدی آرڈرز موصول ہو گئے ہیں۔

رائس ایکسپورٹرز ایسوسی ایشن آف پاکستان (REAP) کے مطابق چینی مارکیٹ میں پاکستانی چاول کو بیحد پسند کیا جا رہا ہے اور اس کی طلب میں روز بروز اضافہ ہو رہا ہے۔ اس بڑھتی ہوئی مانگ کے باعث پاکستانی تاجروں کے لیے چین میں مزید برآمدی اور تجارتی مواقع پیدا ہو رہے ہیں۔

ایسوسی ایشن کے حکام نے مزید بتایا کہ زرعی شعبے میں باہمی تجارت کے فروغ کے تحت پاکستان سے چین کو جلد مکئی کی برآمد بھی شروع کر دی جائے گی۔ اس کے ساتھ ساتھ آنے والے دنوں میں چین کی طرف سے مکئی اور چینی کی برآمد کے مزید بڑے آرڈرز ملنے کی قوی توقع ظاہر کی جا رہی ہے، جس سے پاکستان کے زرعی مبادلے میں خاطر خواہ اضافہ ہوگا۔