حافظ طاہر اشرفی کا امیرالعظیم کے انتقال پر اظہار افسوس، ناقابل تلافی نقصان قرار دیدیا

چیئرمین پاکستان علماء کونسل حافظ طاہر اشرفی نے جماعت اسلامی کے سیکرٹری جنرل امیر العظیم کے انتقال پر گہرے دکھ اور افسوس کا اظہار کرتے ہوئے کہا ہے کہ مرحوم کے ساتھ ان کا تقریباً 42 سے 43 سال کا طویل تعلق تھا، جو آج ان کے خالقِ حقیقی سے جا ملنے پر ختم ہو گیا۔

حافظ طاہر اشرفی نے مرحوم کے ایصالِ ثواب اور درجات کی بلندی کے لیے دعا کرتے ہوئے کہا کہ “اللہ تعالیٰ ان کی مغفرت فرمائے، درجات بلند کرے، ان کی قبر کو جنت کے باغوں میں سے ایک باغ بنائے اور لواحقین و متعلقین کو صبرِ جمیل عطا فرمائے۔” انہوں نے مزید کہا کہ طالبِ علمی کے زمانے سے قائم محبت، احترام اور عقیدت کا یہ رشتہ ہمیشہ ان کے لیے باعثِ سعادت رہے گا۔

ان کا کہنا تھا کہ امیر العظیم کا انتقال ہر اس شخص کے لیے ایک بڑا اور نا قابلِ تلافی نقصان ہے جو ان سے محبت کرتا تھا یا جنہوں نے ان کے اخلاص اور حسنِ اخلاق سے فیض حاصل کیا۔ انہوں نے تمام احباب اور امتِ مسلمہ سے اپیل کی کہ وہ مرحوم کے ایصالِ ثواب، مغفرت اور بلندیٔ درجات کے لیے خصوصی دعائیں کریں۔