نورین نیازی نے جو کچھ بولا یہ انکا ذاتی خیال ہے، پارٹی پالیسی کا حصہ نہیں: بیرسٹر گوہر

چیئرمین پاکستان تحریک انصاف (پی ٹی آئی) بیرسٹر گوہر خان نے نورین نیازی کے حالیہ بیان سے لا تعلقی کا اظہار کرتے ہوئے کہا ہے کہ انہوں نے جو کچھ بھی کہا وہ ان کی ذاتی رائے ہے اور اس کا پارٹی پالیسی سے کوئی تعلق نہیں۔ اڈیالہ جیل کے باہر میڈیا سے گفتگو کرتے ہوئے انہوں نے واضح کیا کہ فوج کی قربانیوں اور شہداء کے حوالے سے کسی کو بھی بے جا لب کشائی کرنے کی اجازت نہیں ہونی چاہیے۔

میڈیا سے بات چیت کرتے ہوئے بیرسٹر گوہر نے ملکی دفاع پر کامل اعتماد کا اظہار کیا اور کہا کہ پاکستان کا دفاع مضبوط ہاتھوں میں ہے اور کوئی دشمن ملک کو شکست نہیں دے سکتا۔ انہوں نے مزید کہا کہ دہشت گردی ملک کے لیے ناسور ہے جس کا خاتمہ ہی ترقی اور استحکام کی ضمانت ہے، جبکہ موجودہ حالات سے نکلنے کے لیے تمام سیاسی مسائل کا دیرپا سیاسی حل نکالنا بے حد ضروری ہے۔