گلگت بلتستان کے عوام کی فلاح کیلئے نومنتخب حکومت کے ساتھ کام کریں گے: وزیراعظم

وزیراعظم شہباز شریف سے وزیراعلیٰ گلگت بلتستان امجد حسین نے اسلام آباد میں ملاقات کی، جس میں خطے کی مجموعی صورتحال اور ترقیاتی امور پر تفصیلی تبادلہ خیال کیا گیا۔ وزیراعظم نے امجد حسین کو نیا عہدہ سنبھالنے پر مبارکباد دیتے ہوئے گلگت بلتستان کے عوام کی فلاح و بہبود کے لیے صوبائی حکومت کے ساتھ مل کر کام کرنے کے عزم کا اعادہ کیا۔ انہوں نے کہا کہ وفاقی حکومت گلگت بلتستان میں قابلِ تجدید توانائی، سیاحت، انفراسٹرکچر، صحت اور تعلیم کے شعبوں کی ترقی کے لیے عملی اقدامات کر رہی ہے، جن میں 100 میگاواٹ کا شمسی توانائی کا منصوبہ، دانش اسکولز کا قیام اور گلگت میں ‘پاکستان آسان خدمت سینٹر’ کا سنگِ بنیاد شامل ہے۔ اس اہم ملاقات میں نائب وزیراعظم و وزیر خارجہ اسحاق ڈار، وفاقی وزیر منصوبہ بندی احسن اقبال اور وزیر اقتصادی امور احد خان چیمہ بھی موجود تھے۔