دریائے سندھ میں کالا باغ اور چناب میں خانکی کے مقام پر نچلے درجے کا سیلاب

پنجاب میں بارشوں کے بعد دریائے سندھ میں کالا باغ اور دریائے چناب میں خانکی کے مقام پر نچلے درجے کی سیلابی صورتحال پیدا ہو گئی ہے، تاہم صوبے کے بیشتر دریاؤں میں فی الحال پانی کا بہاؤ نارمل ہے۔ پروونشل ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق 24 جولائی تک دریاؤں میں پانی کے بہاؤ میں مزید اضافے کا خدشہ ہے، جبکہ لاہور، گوجرانوالہ، سیالکوٹ، راولپنڈی اور دیگر اضلاع میں اربن فلڈنگ اور ڈیرہ غازی خان کی رود کوہیوں میں فلیش فلڈنگ کا الرٹ بھی جاری کر دیا گیا ہے۔ ڈی جی پی ڈی ایم اے عمر عباس میلہ نے دریاؤں کے پاٹ میں مقیم شہریوں کو فوری طور پر محفوظ مقامات پر منتقل ہونے کی ہدایت دیتے ہوئے کہا ہے کہ متاثرہ علاقوں میں تمام تر طبی سہولیات سے لیس فلڈ ریلیف کیمپس قائم کر دیے گئے ہیں۔ انتظامیہ نے شہریوں اور بچوں کو ندی نالوں اور دریاؤں کے اطراف سیر و تفریح سے گریز کرنے کی اپیل کی ہے۔