پی ٹی آئی نے ڈی جی آئی ایس پی آر کی پریس کانفرنس کو افسوسناک قرار دیدیا

پی ٹی آئی کے رہنما بیرسٹر گوہر نے کہا کہ پی ٹی آئی ملک کی سب سے بڑی جماعت ہے اور 70 فیصد عوام بانی پی ٹی آئی کے ساتھ ہیں۔ بانی پی ٹی آئی سیاسی بنیادوں پر مقدمات میں گرفتار ہیں۔ انہوں نے کہا کہ مخصوص نشستیں بھی ہم سے لے لی گئیں لیکن ہم نے برداشت کیا اور ہمیشہ جمہوریت و قانون کی بالادستی کی بات کی۔ بیرسٹر گوہر کا کہنا تھا کہ کل کی پریس کانفرنس مایوس کن تھی، استعمال کیے گئے الفاظ نامناسب تھے۔ کچھ عناصر ٹکراؤ کی فضا پیدا کرنا چاہتے ہیں مگر ہمیں اشتعال دلانے کی کوشش کامیاب نہیں ہوگی۔ انہوں نے کہا کہ مذاکرات ڈیل کے لیے نہیں بلکہ آئین اور قانون کی بالادستی کے لیے ہونے چاہئیں۔ پی ٹی آئی رہنما سلمان اکرم راجا نے کہا کہ ملک کو بارہا جبر کی طرف دھکیلا گیا، آئین پر حملے اور عدلیہ کو دبانے کی کوششیں کی گئیں۔ انہوں نے کہا کہ عوام کی آواز کو ایوانوں تک پہنچانا ضروری ہے، 8 فروری کو عوام نے پی ٹی آئی کو ووٹ دیا مگر نشستیں چھینی گئیں۔ انہوں نے کہا کہ جبر سے ترقی ممکن نہیں، مکالمہ ہی راستہ ہے۔ ملک میں آئینی حرمت بحال کرنے کی ضرورت ہے۔ پی ٹی آئی کے رہنما اسد قیصر نے کہا کہ بانی پی ٹی آئی نے ملک کے لیے تاریخی خدمات انجام دیں، انہیں قومی سلامتی کے لیے خطرہ قرار دینا قابلِ مذمت ہے۔ خیبر پختونخوا کے بارے میں دیے گئے بیانات پر عوام میں غم و غصہ ہے، ایسے الفاظ واپس لینے چاہئیں۔ اسد قیصر نے کہا کہ بانی پی ٹی آئی اور قیادت کی فوری رہائی ہونی چاہیے، ہم ڈیل نہیں، میرٹ اور انصاف چاہتے ہیں۔ ملک کو انارکی کی طرف لے جایا جارہا ہے، جبکہ قومی ڈائیلاگ کی فوری ضرورت ہے۔ پی ٹی آئی قیادت کا کہنا ہے کہ پارٹی پر پابندیاں یا بیانات انہیں کمزور نہیں کرسکتے، عوام کے دلوں میں بسنے والی قیادت نوٹیفکیشن سے ختم نہیں ہوتی۔