7 ویں این ایف سی اور آرٹیکل 160 کی وضاحت کے لیے وفاقی آئینی عدالت سے رجوع کر لیا ہے: مزمل اسلم

خیبرپختونخوا حکومت کے رہنما مزمل اسلم نے پریس کانفرنس کرتے ہوئے بتایا ہے کہ صوبائی حکومت نے 7 ویں نیشنل فنانس کمیشن (NFC) ایوارڈ کے معاملے پر آئین کے آرٹیکل 160 کی وضاحت کے لیے وفاقی آئینی عدالت سے رجوع کر لیا ہے، جس پر چیف جسٹس نے تمام اعتراضات ختم کر کے کیس نمبر الاٹ کر دیا ہے۔ انہوں نے کونسل آف کامن انٹرسٹ (CCI) کے آئینی تقاضے کا ذکر کرتے ہوئے کہا کہ ہر 3 ماہ بعد اس کا اجلاس ہونا ضروری ہے، مگر آخری اجلاس 2025 میں ہوا تھا، جس کی وجہ سے وفاق اور صوبوں کے مسائل التوا کا شکار ہیں۔ ملک میں گندم کی صورتحال پر تشویش کا اظہار کرتے ہوئے انہوں نے کہا کہ 32 ملین ٹن گندم کی موجودگی اور 28 ملین ٹن کی ضرورت کے باوجود گندم کا بحران جنم لے چکا ہے، جبکہ پنجاب حکومت کی جانب سے گندم کی نقل و حمل پر غیر اعلانیہ پابندی اور کسانوں کو 3500 روپے کے بجائے 4500 روپے سے زائد پر خریداری کی بدانتظامی نے زراعت کو شدید متاثر کیا ہے۔ پٹرولیم مصنوعات کی قیمتوں پر بات کرتے ہوئے انہوں نے اوگرا پالیسی اور حکومت کے اقدامات کو آڑے ہاتھوں لیا اور خبردار کیا کہ پیٹرولیم مافیا کی وجہ سے ملک میں تیل کا نیا بحران جنم لے سکتا ہے۔