عام انتخابات 2026: آزاد کشمیر میں جدید رزلٹ مینجمنٹ سسٹم متعارف کرانے کی تیاری

آزاد کشمیر کے چیف الیکشن کمشنر جسٹس (ر) غلام مصطفیٰ مغل کی زیرِ صدارت ایک اہم اجلاس منعقد ہوا، جس میں عام انتخابات 2026 کے لیے تیار کیے جانے والے جدید رزلٹ مینجمنٹ سسٹم (RMS) پر پیش رفت کا تفصیلی جائزہ لیا گیا۔ اجلاس کے دوران آئی ٹی بورڈ کے تعاون سے متعارف کرائے جانے والے اس نئے سسٹم پر بریفنگ دیتے ہوئے بتایا گیا کہ اس جدید نظام کے ذریعے انتخابی نتائج کو انتہائی شفاف، درست اور بروقت مرتب کیا جا سکے گا، جبکہ عوام اور امیدوار حلقہ وار اور پولنگ اسٹیشن وار نتائج بھی دیکھ سکیں گے۔ چیف الیکشن کمشنر جسٹس (ر) غلام مصطفیٰ مغل نے اپنے خطاب میں واضح کیا کہ آزاد کشمیر میں صاف، شفاف اور غیر جانبدارانہ انتخابات کے انعقاد کے لیے جدید انفارمیشن ٹیکنالوجی کا استعمال اب ناگزیر ہو چکا ہے۔ انہوں نے متعلقہ محکموں کو انتخابی انتظامات مربوط حکمتِ عملی کے تحت بروقت مکمل کرنے کی ہدایت کی تاکہ انتخابی عمل پر عوامی اعتماد کو مزید مضبوط کیا جا سکے۔