سابق وزیراعظم آزاد کشمیر سردار تنویر الیاس کے قافلے پر فائرنگ، سیکیورٹی گارڈ جاں بحق، متعدد زخمی

استحکامِ پاکستان پارٹی آزاد کشمیر کے صدر اور سابق وزیراعظم سردار تنویر الیاس خان کے قافلے پر راؤلاکوٹ جاتے ہوئے ٹائیں ڈھلکوٹ کے مقام پر نامعلوم افراد کی جانب سے مبینہ طور پر شدید فائرنگ کی گئی ہے۔ اس افسوسناک واقعے کے نتیجے میں سردار تنویر الیاس کے پرسنل سیکیورٹی گارڈ سردار آصف یوسف سر پر گولی لگنے کے باعث موقع پر ہی جاں بحق ہو گئے، جن کا تعلق پلندری سے تھا اور وہ حال ہی میں وزیراعظم پاکستان کی سیکیورٹی ڈیوٹی سے ریٹائر ہوئے تھے۔ فائرنگ کے نتیجے میں سابق معاونِ خصوصی سردار امتیاز شاہین کے بھی زخمی ہونے کی اطلاعات ہیں جبکہ حملے کی وجہ سے قافلے میں شامل متعدد گاڑیوں کے شیشے ٹوٹ گئے۔ ڈی آئی جی آزاد کشمیر کے مطابق واقعے کی تفتیش شروع کر دی گئی ہے اور قانون ہاتھ میں لینے والوں کے خلاف سخت کارروائی عمل میں لائی جائے گی۔