سعودی شہر ریاض میں گیس سلینڈر کا دھماکا، 6 پاکستانی جاں بحق

سعودی عرب کے دارالحکومت ریاض میں گزشتہ شب ایک رہائشی عمارت میں گیس سلنڈر پھٹنے کے نتیجے میں چھ پاکستانی شہری جاں بحق ہو گئے۔ غیر ملکی میڈیا رپورٹس کے مطابق یہ افسوسناک واقعہ ریاض کے گنجان آباد علاقے ’منفوحہ‘ میں پیش آیا، جہاں گیس سلنڈر دھماکے کی زد میں آ کر وہاں مقیم چھ اوورسیز پاکستانی موقع پر ہی دم توڑ گئے۔

ریاض میں متعین پاکستانی سفارت خانے نے اس دردناک واقعے اور پاکستانی شہریوں کے جاں بحق ہونے کی باضابطہ تصدیق کی ہے۔ سفارت خانے کے ترجمان کا کہنا ہے کہ وہ جاں بحق ہونے والے افراد کی میتوں کی جلد از جلد وطن واپسی اور دیگر ضروری قانونی کارروائیوں کی تکمیل کے لیے سعودی عرب کے متعلقہ حکام اور پولیس انتظامیہ کے ساتھ مسلسل رابطے میں ہیں۔ واقعے کی اطلاع ملنے کے بعد سے منفوحہ میں مقیم پاکستانی کمیونٹی شدید صدمے اور سوگ کی حالت میں ہے۔