امریکی صدر ٹرمپ کو فیفا کے پہلے امن ایوارڈ سے نوازا گیا

واشنگٹن: امریکی صدر ڈونلڈ ٹرمپ کو عالمی امن کے فروغ میں اہم کردار ادا کرنے پر فیفا کے پہلے امن ایوارڈ سے نوازا گیا۔ یہ اعزاز اگلے سال امریکا، کینیڈا اور میکسیکو میں مشترکہ طور پر ہونے والے فٹبال ورلڈ کپ کے ڈراز کی تقریب کے دوران پیش کیا گیا۔

واشنگٹن میں منعقدہ تقریب میں فیفا کے صدر جیانی انفینٹینو نے ایوارڈ صدر ٹرمپ کو پیش کیا۔ امریکی میڈیا کے مطابق یہ ایوارڈ ایسے افراد کو سراہنے کے لیے دیا جاتا ہے جنہوں نے عالمی سطح پر امن کے لیے غیرمعمولی خدمات انجام دی ہوں۔

ایوارڈ وصول کرنے کے بعد صدر ٹرمپ نے کہا کہ یہ ان کی زندگی کے سب سے بڑے اعزازات میں سے ایک ہے۔ انہوں نے دعویٰ کیا کہ ان کی کوششوں سے لاکھوں جانیں بچائی گئیں اور کانگو اور پاک بھارت کے معاملات میں ممکنہ جنگ کو شروع ہونے سے پہلے روکا گیا۔

صدر ٹرمپ نے فیفا کے صدر جیانی انفینٹینو کی کوششوں کو بھی سراہا اور کہا کہ انہوں نے فٹبال کے ٹکٹوں کی فروخت میں نئے ریکارڈ قائم کیے، جو عالمی فٹبال کے لیے بھی ایک بڑا اعزاز ہے۔