امریکا نے اہواز میں کینسر ہسپتال کے اطراف کے علاقوں کو نشانہ بنایا، حسین کرمان پور

ایران اور امریکا کے درمیان جاری فضائی جنگ کے دوران ایک اور افسوسناک واقعہ سامنے آیا ہے، جہاں جنوب مغربی ایران کے شہر اہواز میں واقع کینسر اسپتال کے قریبی علاقوں کو میزائل حملے کا نشانہ بنایا گیا ہے۔ ایرانی وزارتِ صحت و طبی تعلیم کے شعبہ تعلقاتِ عامہ کے سربراہ حسین کرمان پور نے اس حملے کی تصدیق کی ہے۔

حسین کرمان پور نے سماجی رابطے کی ویب سائٹ ایکس (سابقہ ٹوئٹر) پر جاری کردہ اپنی ایک پوسٹ میں بتایا کہ میزائل حملے کے بعد ہونے والے شدید دھماکوں اور زمین لرزا دینے والے زوردار جھٹکوں کے باعث اسپتال کے اندر اور اطراف کے علاقوں میں شدید خوف و ہراس پھیل گیا۔ انہوں نے مزید بتایا کہ ان زوردار دھماکوں کے نتیجے میں زیرِ علاج کینسر کے متعدد مریض اور ان کی دیکھ بھال کے لیے موجود اہل خانہ خوف زدہ ہو کر ہنگامی طور پر اسپتال کی عمارت سے باہر نکل آئے، جبکہ حملے کے باعث اسپتال کے قریبی بنیادی ڈھانچے اور رہائشی علاقوں کو بھی شدید نقصان پہنچا ہے۔