خیبرپختونخوا کابینہ کا بڑا فیصلہ: 9 اور 10 مئی کے مقدمات ختم

خیبرپختونخوا حکومت نے 9 اور 10 مئی کے واقعات سے متعلق تمام مقدمات ختم کرنے کا فیصلہ کرتے ہوئے انہیں سیاسی انتقام اور بے بنیاد قرار دیا۔ صوبائی کابینہ نے وزیراعلیٰ سہیل آفریدی کی زیرِ صدارت اجلاس میں اس فیصلے کی باقاعدہ منظوری دی۔

اجلاس کے بعد معاونِ خصوصی برائے اطلاعات شفیع جان نے بتایا کہ کابینہ نے مقدمات کے خاتمے کے ساتھ ریڈیو پاکستان پشاور کے واقعے کی انکوائری صوبائی اسمبلی کی خصوصی کمیٹی کے حوالے کرنے کی منظوری بھی دی ہے، تاکہ معاملے کی شفاف اور غیرجانبدارانہ تحقیقات کی جا سکیں۔

کابینہ اجلاس میں انسدادِ دہشت گردی فورس (ATF) کے لیے 15 کروڑ روپے کی خصوصی گرانٹ کی منظوری بھی دی گئی، جس کا مقصد فورس کی استعداد کار میں اضافہ اور سیکیورٹی اقدامات کو مزید مضبوط بنانا ہے۔