حکومت نے ٹی ٹی ایس فیکلٹی کی تنخواہوں میں 35 فیصد اضافے کی منظوری دیدی

وفاقی حکومت نے ٹینیور ٹریک سسٹم (TTS) فیکلٹی کی تنخواہوں میں 35 فیصد اضافے کی باقاعدہ منظوری دے دی ہے، جس کا وزارتِ خزانہ نے نظرثانی شدہ پے پیکیج کے تحت نوٹیفکیشن بھی جاری کر دیا ہے۔ نوٹیفکیشن کے مطابق، اس فیصلے کا اطلاق یکم جولائی 2026 سے ہوگا اور اس کے تحت پروفیسر، ایسوسی ایٹ پروفیسر اور اسسٹنٹ پروفیسرز کے پے سکیلز میں 35 فیصد اضافہ کیا جائے گا، جبکہ ملازمین کی بنیادی تنخواہ 30 جون 2026 کو حاصل کردہ اسٹیج کے مطابق نئے پے سکیل میں فکس ہوگی۔ وزارتِ خزانہ نے واضح کیا ہے کہ تنخواہوں میں اضافے سے پیدا ہونے والے تمام مالی اخراجات متعلقہ جامعات کو اپنے وسائل سے پورے کرنے ہوں گے اور وفاقی حکومت پر اس کا کوئی اضافی مالی بوجھ نہیں پڑے گا، جبکہ ملازمین کی دیگر تمام سروس شرائط بدستور برقرار رہیں گی۔