شہدا کی توہین ناقابلِ قبول، مولانا فضل الرحمان قوم سے معافی مانگیں: سپیکر پنجاب اسمبلی

اسپیکر پنجاب اسمبلی ملک محمد احمد خان نے واضح کیا ہے کہ شہدائے وطن کی تضحیک کسی صورت قابلِ قبول نہیں اور جمعیت علمائے اسلام (ف) کے سربراہ مولانا فضل الرحمان کو اپنے حالیہ متنازع بیان پر پوری قوم سے معافی مانگنی چاہیے۔ لاہور میں پریس کانفرنس سے خطاب کرتے ہوئے انہوں نے کہا کہ سیاسی اختلافات اپنی جگہ، لیکن قومی اداروں اور شہدا کے احترام پر کوئی سمجھوتا نہیں کیا جا سکتا۔ اسپیکر پنجاب اسمبلی نے دہشت گردوں کے ساتھ مذاکرات کی تجویز کو یکسر مسترد کرتے ہوئے کہا کہ مساجد، امام بارگاہوں، عدالتوں اور معصوم شہریوں کو نشانہ بنانے والے عناصر کو سیاسی جدوجہد کرنے والوں کے برابر نہیں رکھا جا سکتا؛ بلوچستان میں دہشت گردی اور کلبھوشن یادیو کے اعترافات کے بعد ریاست کی ذمہ داری دہشت گردوں کے خلاف آہنی ہاتھوں سے کارروائی کرنا ہے، نہ کہ ان سے مذاکرات کرنا۔ انہوں نے مزید کہا کہ انتخابی تنازعات کا حل سڑکوں پر احتجاج کے بجائے الیکشن ٹریبونلز جیسے آئینی اور قانونی فورمز کے ذریعے نکالا جانا چاہیے اور ملکی بقا کے لیے ریاستی اداروں، افواجِ پاکستان اور شہدا کا وقار ہر صورت مقدم رہنا چاہیے۔