غزہ پر اسرائیلی حملوں میں مزید 7 فلسطینی شہید، متعدد زخمی

ظلوم فلسطینیوں پر وحشیانہ بمباری کا سلسلہ جاری ہے اور غزہ پر تازہ اسرائیلی حملوں کے نتیجے میں مزید 7 فلسطینی شہید جبکہ متعدد زخمی ہو گئے ہیں۔ فلسطینی خبر رساں ادارے ‘وفا’ کے مطابق، غزہ شہر کے جنوبی علاقے شیخ عجلین میں اسرائیلی فوج کی جارحیت کے نتیجے میں ایک شخص جان کی بازی ہار گیا جبکہ کئی افراد شدید زخمی ہوئے۔ ایک اور کارروائی میں اسرائیلی ڈرون نے خلیل الوزیر مسجد کے قریب نہتے شہریوں کے ایک گروپ کو نشانہ بنایا۔ اس سے قبل جبالیہ پناہ گزین کیمپ کے قریب بھی اسرائیلی ڈرون حملے میں 6 فلسطینی شہید اور متعدد زخمی ہوئے تھے۔ واضح رہے کہ 7 اکتوبر 2023 سے غزہ پر مسلط کردہ اس یکطرفہ اسرائیلی جنگ میں اب تک کم از کم 73,233 فلسطینی شہید اور 173,707 سے زائد افراد زخمی ہو چکے ہیں، جبکہ عالمی برادری تاحال مستقل جنگ بندی کرانے میں ناکام نظر آتی ہے۔