الیکشن کمیشن نے خواتین ووٹرز کی رجسٹریشن مہم تیز کر دی

الیکشن کمیشن آف پاکستان (ای سی پی) نے ملک بھر میں خواتین اور مرد ووٹرز کے مابین صنفی فرق کو کم کرنے کے لیے خواتین ووٹرز کی رجسٹریشن مہم میں تیزی لانے کا فیصلہ کیا ہے۔ الیکشن کمیشن کے مطابق، موبائل رجسٹریشن وینز کے ذریعے دور دراز اور پسماندہ علاقوں سمیت ملک کے 62 اضلاع میں اس خصوصی مہم کا آغاز کر دیا گیا ہے، جس کا بنیادی مقصد زیادہ سے زیادہ اہل خواتین کو ووٹر فہرستوں کا حصہ بنانا ہے۔ ذرائع کا کہنا ہے کہ اس مہم کے تحت تقریباً 18 لاکھ نئی خواتین ووٹرز کی رجسٹریشن کا ہدف مقرر کیا گیا ہے۔ الیکشن کمیشن نے واضح کیا ہے کہ ادارے کا ہدف ہر سال ووٹرز کے صنفی فرق میں ایک فیصد کمی لانا ہے۔ اعداد و شمار کے مطابق، 2018 کے عام انتخابات کے بعد سے اب تک خواتین ووٹرز کا صنفی فرق بتدریج کم ہو کر 7.74 فیصد رہ گیا ہے، تاہم اس فرق کو مزید ختم کرنے کے لیے خواتین کو شناختی کارڈ اور ووٹر رجسٹریشن کی سہولیات ان کی دہلیز پر پہنچائی جا رہی ہیں تاکہ وہ ملکی انتخابی عمل کا بھرپور حصہ بن سکیں۔