ایران کے بحرین میں ففتھ فلیٹ، اماراتی ٹینکروں، امریکی بحری جہاز پر حملے

امریکہ کی جانب سے ایرانی بندرگاہوں کی بحری ناکہ بندی کے اعلان کے بعد مشرقِ وسطیٰ میں جنگ کے شعلے بھڑک اٹھے ہیں اور ایران نے جوابی کارروائی کرتے ہوئے بحرین میں امریکی بحریہ کے پانچویں بیڑے (ففتھ فلیٹ)، امریکی جنگی جہاز اور متحدہ عرب امارات کے آئل ٹینکرز کو نشانہ بنانے کا دعویٰ کیا ہے۔ ایرانی پاسدارانِ انقلاب (IRGC) اور سرکاری نشریاتی ادارے ‘آئی آر آئی بی’ کے مطابق، ایرانی بحریہ نے امریکی بحری جہاز کو کروز میزائلوں سے نشانہ بنایا۔ اس کے ساتھ ہی بحرین میں قائم امریکی ففتھ فلیٹ کے ہیڈ کوارٹر پر بیلسٹک میزائلوں اور خودکش ڈرونز سے ہولناک حملہ کیا گیا، جس کے نتیجے میں فوجی اڈے پر موجود ایندھن کے ذخائر میں شدید آگ لگ گئی۔ ایرانی حکام کا دعویٰ ہے کہ اس کارروائی میں امریکی ریڈار سسٹمز بشمول پیٹریاٹ ایئر ڈیفنس سسٹم اور کنٹرول سینٹر کو مکمل طور پر تباہ کر دیا گیا ہے، اور یہ حملے ایران کی جاری دفاعی مہم کا حصہ ہیں جو بدستور جاری رہیں گے۔

پاسدارانِ انقلاب نے مزید بتایا کہ انہوں نے آبنائے ہرمز میں انتباہ کو نظر انداز کرنے والے دو غیر ملکی آئل ٹینکرز کو بھی نشانہ بنا کر ناکارہ بنا دیا ہے، جنہوں نے اپنے نیویگیشن سسٹمز بند کر کے بارودی سرنگوں والے ممنوعہ راستے سے گزرنے کی کوشش کی تھی۔ ایرانی عسکری حکام نے خبردار کیا ہے کہ آبنائے ہرمز میں جارح امریکی دشمن کے ساتھ کسی بھی قسم کا تعاون اس اہم ترین بحری گزرگاہ کے دوبارہ کھلنے میں تاخیر کا باعث بنے گا جس سے شدید عالمی توانائی بحران پیدا ہو سکتا ہے۔ اس کشیدہ صورتحال کے دوران خلیجی عرب ممالک سمیت مختلف دیگر مقامات پر بھی متعدد حملوں کی اطلاعات موصول ہوئی ہیں۔

دوسری جانب، متحدہ عرب امارات کی وزارتِ دفاع نے خلیج فارس میں اپنے دو بحری جہازوں پر ایرانی حملے کی باضابطہ تصدیق کی ہے۔ اماراتی حکام کے مطابق، دو آئل ٹینکرز ‘مومباسا’ اور ‘باہیا’ آبنائے ہرمز کے جنوبی راستے اور عمان کی علاقائی سمندری حدود کے قریب ایران کے دو کروز میزائلوں کا نشانہ بنے۔ متحدہ عرب امارات کی وزارتِ دفاع کی جانب سے سوشل میڈیا پلیٹ فارم ‘ایکس’ پر جاری کردہ بیان کے مطابق، اس حملے کے نتیجے میں آئل ٹینکر ‘مومباسا’ کے عملے کا ایک بھارتی کارکن ہلاک ہو گیا ہے جبکہ مزید 8 افراد زخمی ہوئے ہیں جن میں سے 4 کی حالت انتہائی تشویشناک بتائی جاتی ہے۔ زخمیوں میں 6 بھارتی اور 2 یوکرینی شہری شامل ہیں۔