ووٹرز لسٹوں سے مسلمانوں کے نام حذف: یواین نمائندوں کی بھارتی حکومت سے وضاحت طلب

اقوامِ متحدہ کے خصوصی نمائندوں نے بھارتی حکومت کے نام ایک کھلا خط جاری کرتے ہوئے انتخابی فہرستوں سے لاکھوں ووٹروں، بالخصوص مسلمانوں اور بنگالی برادری سے تعلق رکھنے والے افراد کے نام مبینہ طور پر حذف کیے جانے کے سنگین الزامات پر باضابطہ وضاحت طلب کر لی ہے۔ خط میں مودی حکومت سے مطالبہ کیا گیا ہے کہ وہ مذہب اور نسل کی بنیاد پر ووٹر لسٹوں سے خارج کیے گئے شہریوں کا تفصیلی ڈیٹا فراہم کرے اور اس نظرثانی کے عمل پر جامع جواب جمع کرائے۔ یو این نمائندوں کے مطابق انہیں ایسی شکایات موصول ہوئی ہیں جن میں دعویٰ کیا گیا ہے کہ صرف مغربی بنگال میں لگ بھگ 91 لاکھ نام ووٹر لسٹوں سے نکالے گئے، جبکہ پورے بھارت میں مجموعی طور پر تقریباً 5 کروڑ 20 لاکھ ووٹروں کے نام خارج کیے جانے کی شکایات سامنے آئی ہیں۔

خط میں نشاندہی کی گئی ہے کہ بعض حساس علاقوں، خصوصاً نندی گرام میں ووٹر لسٹوں سے نکالے گئے افراد کی ایک بڑی تعداد مسلمانوں پر مشتمل تھی، جس سے مسلم اور بنگالی برادری کو جان بوجھ کر نشانہ بنائے جانے کے الزامات کو تقویت ملتی ہے۔ خصوصی نمائندوں کا کہنا ہے کہ مغربی بنگال کے انتخابات سے قبل لگ بھگ 34 لاکھ ووٹر اپیلوں پر کوئی فیصلہ نہیں ہو سکا، جبکہ انتخابی عمل کو متاثر کرنے اور دھاندلی کے لیے مصنوعی ذہانت (AI) کے استعمال کے الزامات بھی سامنے آئے ہیں۔ اقوامِ متحدہ نے بھارتی حکومت پر زور دیا ہے کہ وہ انتخابی عمل میں شفافیت اور انسانی حقوق کے بین الاقوامی اصولوں کی پاسداری یقینی بنائے اور اقلیتوں کو امتیازی سلوک سے بچانے کے لیے عملی اقدامات کرے۔ خط میں واضح کیا گیا ہے کہ اگر یہ الزامات درست ثابت ہوئے تو یہ بین الاقوامی انسانی حقوق کی سنگین خلاف ورزی تصور ہوگی، لہٰذا بھارت متاثرہ ووٹروں کو قانونی چارہ جوئی اور مساوی شرکت کی ضمانت دیتے ہوئے اپنا مؤقف عوامی سطح پر بھی جاری کرے۔