یورپی ممالک کا روس پر سائبر حملوں کا الزام، نئی پابندیاں عائد کردیں

یورپی ممالک نے روس پر یورپی یونین کے رکن ممالک کے خلاف بڑے پیمانے پر سائبر مہم چلانے کا الزام عائد کرتے ہوئے سخت ردعمل کا اظہار کیا ہے۔ غیر ملکی میڈیا کے مطابق ان سنگین الزامات کے بعد جرمنی نے برلن میں تعینات روسی سفیر کو طلب کر کے شدید احتجاج ریکارڈ کرایا ہے۔ جرمن وزارتِ خارجہ کا اس حوالے سے کہنا ہے کہ جرمنی، یورپی یونین کے دیگر شراکت دار ممالک اور یوکرین کے خلاف کیے جانے والے یہ سائبر حملے کسی صورت قابلِ قبول نہیں ہیں۔ وزارت نے واضح کیا کہ ان روسی سائبر حملوں کا بھرپور اور فیصلہ کن جواب دیا جائے گا، جس میں روس پر مزید سخت اقتصادی و سفارتی پابندیاں عائد کرنا بھی شامل ہو سکتا ہے۔

دوسری جانب، یورپ میں بڑھتے ہوئے سائبر حملوں کے تناظر میں یورپی یونین اور برطانیہ نے مشترکہ کارروائی کرتے ہوئے روس کے خلاف نئی پابندیاں عائد کر دی ہیں۔ اس نئی سفارتی اور اقتصادی کارروائی کے تحت یورپی یونین نے روس کی 9 اہم شخصیات اور 4 اداروں کو پابندیوں کی بلیک لسٹ میں شامل کیا ہے، جبکہ برطانیہ نے مزید سخت قدم اٹھاتے ہوئے روس کے 24 افراد اور اداروں کو بلیک لسٹ کر دیا ہے۔ یورپی قیادت کا مؤقف ہے کہ ان اقدامات کا مقصد روس کو یورپی ممالک کی سلامتی اور ڈیجیٹل انفراسٹرکچر کو نشانہ بنانے سے باز رکھنا ہے۔