شہباز شریف اور نوازشریف کی امیر قطر سے ملاقات، سابق امیر قطر کے انتقال پر تعزیت

وزیراعظم شہباز شریف اور سابق وزیراعظم نواز شریف نے قطر کے دارالحکومت دوحہ میں امیر قطر شیخ تمیم بن حمد آل ثانی سے ملاقات کی اور ان سے سابق امیر قطر شیخ حمد بن خلیفہ آل ثانی کے انتقال پر گہری تعزیت اور ہمدردی کا اظہار کیا۔ اس موقع پر وزیراعظم شہباز شریف نے مرحوم شیخ حمد بن خلیفہ آل ثانی کی دوراندیش قیادت اور مدبرانہ کردار کو زبردست خراجِ عقیدت پیش کرتے ہوئے کہا کہ ان کی خدمات کے باعث قطر ایک جدید، مستحکم اور خوشحال ریاست کے طور پر ابھرا، جبکہ خطے کے امن اور استحکام کے لیے ان کا کردار ہمیشہ یاد رکھا جائے گا۔ پاکستانی وفد، جس میں نائب وزیراعظم و وزیر خارجہ اسحاق ڈار اور وفاقی وزیر اطلاعات عطاء اللہ تارڑ بھی شامل تھے، نے مرحوم سابق امیر قطر کی مغفرت اور درجات کی بلندی کے لیے فاتحہ خوانی کی۔ امیر قطر شیخ تمیم بن حمد آل ثانی نے دکھ کی اس گھڑی میں دوحہ آمد پر وزیراعظم شہباز شریف، نواز شریف اور پاکستانی وفد کا شکریہ ادا کیا۔