مریم نواز سے پرتگال کے سفیر کی ملاقات، تجارت، سرمایہ کاری بڑھانے پر اتفاق

وزیراعلیٰ پنجاب مریم نواز شریف سے پرتگال کے سفیر پالو ڈومینگوز نے ملاقات کی، جس میں تجارت، زراعت، لائیوسٹاک اور دیگر شعبوں میں باہمی تعاون کو فروغ دینے پر تفصیلی تبادلہ خیال کیا گیا۔ ملاقات کے دوران دوطرفہ تعلقات کو مزید مضبوط بنانے کے لیے ‘پاکستان-پرتگال بزنس فورم’ کے قیام کی تجویز دی گئی، جبکہ لاہور اور لزبن کو ‘سسٹر سٹی’ بنانے کے حوالے سے بھی اتفاق کیا گیا۔ وزیراعلیٰ مریم نواز شریف نے پرتگالی کمپنیوں کو پنجاب میں سرمایہ کاری کی دعوت دیتے ہوئے فارماسیوٹیکل، توانائی، آبی وسائل اور ڈیجیٹل جدت کے شعبوں میں تعاون کے امکانات پر زور دیا۔ پرتگالی سفیر نے صوبے میں صحت کے شعبے، بالخصوص پہلے سرکاری کینسر ہسپتال کے قیام پر وزیراعلیٰ کی کاوشوں کو سراہا اور انہیں پرتگال کے سرکاری دورے کی دعوت دی۔ مریم نواز شریف نے اس عزم کا اظہار کیا کہ پاکستان اور پرتگال کے درمیان دیرینہ تعلقات کو ادارہ جاتی تعاون کے ذریعے نئی بلندیوں تک لے جایا جائے گا، ساتھ ہی انہوں نے دونوں ممالک کے درمیان ثقافتی اور تعلیمی تبادلوں کے ذریعے عوامی روابط بڑھانے پر بھی اتفاق کیا۔