یومِ شہدائے کشمیر،13 جولائی حق، قربانی اور استقامت کا عظیم دن ہے: محسن نقوی

وفاقی وزیرِ داخلہ محسن نقوی نے یومِ شہدائے کشمیر کے موقع پر 13 جولائی 1931 کے 22 کشمیری شہداء کو شاندار خراجِ عقیدت پیش کرتے ہوئے کہا ہے کہ یہ تاریخی دن حق، قربانی اور استقامت کی لازوال داستان کی یاد دلاتا ہے۔ اپنے خصوصی پیغام میں انہوں نے کہا کہ ڈوگرہ راج کے ظلم و جبر کے خلاف اذان کے دوران جانوں کا نذرانہ پیش کرنے والے شہداء کا لہو کشمیریوں کے حقِ خودارادیت کی جدوجہد کو نئی طاقت اور سمت فراہم کر رہا ہے۔ وزیرِ داخلہ نے بھارت کے غیر قانونی اور غیر آئینی اقدامات پر کڑی تنقید کرتے ہوئے کہا کہ طویل پابندیوں اور انسانی حقوق کی سنگین خلاف ورزیوں نے مقبوضہ وادی کو دنیا کی سب سے بڑی جیل میں تبدیل کر دیا ہے۔ انہوں نے عالمی برادری اور انسانی حقوق کی تنظیموں سے مقبوضہ جموں و کشمیر کی صورتحال کا فوری نوٹس لینے کا مطالبہ کیا۔ محسن نقوی نے واضح کیا کہ کشمیر پاکستان کی شہ رگ ہے اور مسئلہ کشمیر کا پائیدار حل صرف اقوامِ متحدہ کی قراردادوں کے مطابق ہی ممکن ہے، پاکستان کشمیریوں کو کسی موڑ پر تنہا نہیں چھوڑے گا اور آزادی تک ہر عالمی فورم پر ان کی مؤثر آواز بنتا رہے گا۔