ایشین انڈر 18 والی بال چیمپئن شپ میں پاکستان کا فاتحانہ آغاز

ایشین بوائز انڈر 18 والی بال چیمپئن شپ 2026 میں پاکستان نے شاندار آغاز کرتے ہوئے اپنے پہلے میچ میں کرغیزستان کو اسٹریٹ سیٹس میں 0-3 سے شکست دے دی ہے۔ چین کے شہر ہائیکو میں کھیلے گئے ایونٹ کے پہلے میچ میں پاکستانی ٹیم نے ابتدا ہی سے کھیل پر مکمل گرفت برقرار رکھی اور حریف ٹیم کو سنبھلنے کا موقع نہ دیا۔ پاکستان کی جیت کا اسکور 10-25، 19-25 اور 17-25 رہا۔

قومی انڈر 18 ٹیم نے پہلے سیٹ میں مؤثر سروس، مضبوط بلاکنگ اور جارحانہ حملوں کے ذریعے حریف کو دباؤ میں رکھا اور باآسانی 25-10 سے کامیابی حاصل کی۔ دوسرے سیٹ میں کرغیزستان نے مزاحمت کی کچھ کوشش کی، تاہم پاکستان نے نظم و ضبط اور عمدہ ٹیم ورک کا مظاہرہ کرتے ہوئے یہ سیٹ بھی 25-19 سے اپنے نام کیا۔ تیسرے سیٹ میں بھی گرین شرٹس نے دفاع اور اٹیک دونوں شعبوں میں بہترین کھیل پیش کیا اور 25-17 سے کامیابی سمیٹ کر میچ میں کلین سویپ مکمل کیا۔ پاکستان کی جانب سے فہد علی، محمد انس، کپتان محمد عرفان، اسد اللہ اور فیضان اللہ نے انتہائی نمایاں کارکردگی دکھائی۔

پاکستان انڈر 18 ٹیم کے ہیڈ کوچ کفایت اللہ نے اس شاندار فتح پر اطمینان کا اظہار کرتے ہوئے کہا کہ اتنے بڑے ٹورنامنٹ کا فاتحانہ آغاز ہمیشہ ٹیم کے مورال کے لیے اہم ہوتا ہے۔ کھلاڑیوں نے گیم پلان پر مؤثر انداز میں عمل کیا، تاہم اب ہماری توجہ آئندہ میچوں پر مرکوز ہے کیونکہ قازقستان اور تھائی لینڈ مضبوط حریف ہیں۔ پاکستان اپنا دوسرا گروپ میچ 13 جولائی کو قازقستان جبکہ تیسرا میچ 14 جولائی کو تھائی لینڈ کے خلاف کھیلے گا، یہ دونوں میچز پاکستانی وقت کے مطابق صبح 7:30 بجے شروع ہوں گے۔