ڈیرہ غازی خان: قبائلی علاقے میں 11 سالہ لڑکی مبینہ طور پر فروخت کر دی گئی

ڈیرہ غازی خان کے قبائلی علاقے پھگلہ میں ایک انتہائی افسوسناک اور لرزہ خیز واقعہ سامنے آیا ہے جہاں ایک سفاک والد نے اپنی 11 سالہ معصوم بیٹی کو مبینہ طور پر 15 لاکھ روپے کے عوض ایک 78 سالہ معمر شخص کو فروخت کر دیا۔ بارڈر ملٹری پولیس (BMP) کے مطابق، واقعے کی اطلاع ملتے ہی قانون نافذ کرنے والے ادارے فوری طور پر متحرک ہوئے۔ کمانڈنٹ بی ایم پی امیر تیمور نے تصدیق کی ہے کہ کارروائی کرتے ہوئے 78 سالہ مبینہ دولہا کو گرفتار کر لیا گیا ہے جبکہ معصوم لڑکی کو فروخت کرنے والے والد اور اس گھناؤنے جرم کے دیگر سہولت کاروں کی تلاش کے لیے چھاپے مارے جا رہے ہیں۔ بارڈر ملٹری پولیس کا مزید کہنا ہے کہ قانون کے تحت کم عمر لڑکی سے زبردستی نکاح پڑھانے والے نکاح خواں سمیت تمام ملوث ملزمان کے خلاف سخت قانونی کارروائی عمل میں لائی جا رہی ہے اور انہیں قرار واقعی سزا دلائی جائے گی۔