جوہری ہتھیار ختم کرنے ہیں تو آغاز امریکا اور اس کے اتحادیوں سے کریں؛ شمالی کوریا

شمالی کوریا نے نیٹو (NATO) کے حالیہ سربراہی اجلاس میں اپنے جوہری ہتھیاروں کو تلف کرنے کے مطالبے کو کڑی تنقید کا نشانہ بناتے ہوئے اسے مغربی ممالک کا دوہرا معیار قرار دیا ہے۔ سرکاری خبر رساں ادارے ‘کے سی این اے’ (KCNA) کے مطابق، شمالی کوریا کی وزارتِ خارجہ نے ایک بیان میں کہا ہے کہ نیٹو مسلسل اپنے عسکری اتحاد کو وسعت دے رہا ہے اور دفاعی اخراجات سمیت اپنی جوہری صلاحیتوں کو مضبوط کر رہا ہے، جس سے ثابت ہوتا ہے کہ یہ اتحاد امن کے بجائے محاذ آرائی کی پالیسی پر گامزن ہے۔ بیان میں واضح کیا گیا کہ اگر واقعی جوہری ہتھیاروں کا خاتمہ مقصود ہے تو اس کا آغاز امریکا اور نیٹو کے ان اتحادی ممالک سے ہونا چاہیے جن کی سرزمین پر امریکی جوہری ہتھیار تعینات ہیں۔ مزید برآں، شمالی کوریا کے رہنما کم جونگ اِن نے فوج کو جدید ٹیکنالوجی سے لیس کرنے اور ملک کی جوہری و دفاعی صلاحیتوں کو مزید تیز کرنے کی سخت ہدایات جاری کی ہیں، اور واضح کیا ہے کہ وہ یکطرفہ طور پر جوہری پروگرام ترک کرنے کے کسی بھی دباؤ کو قبول نہیں کریں گے۔