حکومت نے جیٹ فیول کی قیمت میں بھی اضافہ کر دیا گیا

وفاقی حکومت نے پٹرولیم مصنوعات کی قیمتوں میں اضافے کے بعد اب ہوائی جہازوں کے ایندھن (جیٹ فیول) کی قیمت میں بھی بھاری اضافہ کر دیا ہے۔ ذرائع کے مطابق، حکومت کی جانب سے جیٹ فیول کی قیمت میں 13 روپے 23 پیسے فی لیٹر کا اضافہ کیا گیا ہے، جس کے بعد اس کی نئی قیمت 251 روپے 2 پیسے فی لیٹر کی سطح پر پہنچ گئی ہے۔ اس اقدام سے ملکی و غیر ملکی ایئر لائنز کے لیے آپریشنل اخراجات بڑھنے اور فضائی سفر کے کرایوں میں مزید اضافے کا خدشہ پیدا ہو گیا ہے۔

واضح رہے کہ اس سے قبل حکومت نے ملک بھر میں پٹرولیم مصنوعات کی قیمتوں میں ایک بار پھر بڑا اضافہ کیا تھا۔ پٹرولیم ڈویژن کی جانب سے جاری کردہ باقاعدہ نوٹیفکیشن کے مطابق، پٹرول کی فی لیٹر قیمت میں 13 روپے 18 پیسے جبکہ ہائی اسپیڈ ڈیزل کی قیمت میں 13 روپے 80 پیسے فی لیٹر اضافہ کیا گیا ہے۔ اس حالیہ اضافے کے بعد ملک میں پٹرول کی نئی قیمت 310 روپے 71 پیسے فی لیٹر اور ہائی اسپیڈ ڈیزل کی نئی قیمت 323 روپے 30 پیسے فی لیٹر مقرر کر دی گئی ہے، جس نے عوامی سطح پر مہنگائی کے نئے خدشات کو جنم دیا ہے