یوکرینی حملوں سے ایک ہفتے میں 38 روسی شہری ہلاک ہوئے: ماریہ زخارووا

روسی وزارتِ خارجہ کی ترجمان ماریہ زخارووا نے انکشاف کیا ہے کہ گزشتہ ایک ہفتے کے دوران یوکرینی فورسز کے حملوں کے نتیجے میں ایک بچے سمیت 38 روسی شہری ہلاک ہو گئے ہیں۔ روس یوکرین جنگ کی تازہ ترین صورتحال پر جاری اپنے ایک بیان میں ماریہ زخارووا کا کہنا تھا کہ گزشتہ ایک ہفتے میں یوکرینی جنگجوؤں کی کارروائیوں سے مجموعی طور پر 308 عام شہری متاثر ہوئے، جن میں سے 38 افراد جاں بحق اور 8 بچوں سمیت 270 افراد شدید زخمی ہوئے ہیں۔ روسی ترجمان نے یوکرینی صدر پر سنگین الزامات عائد کرتے ہوئے کہا کہ ولادیمیر زیلنسکی کی حکومت روس کی سویلین آبادی اور اہم بنیادی ڈھانچے (Infrastructures) کو جان بوجھ کر نشانہ بنا رہی ہے اور ان حملوں میں مسلسل شدت لائی جا رہی ہے۔ انہوں نے مزید کہا کہ یوکرینی اقدامات کا اصل مقصد اپنے مغربی سرپرستوں کو یہ باور کرانا ہے کہ ان کی فراہم کردہ عسکری و مالی امداد مؤثر طریقے سے استعمال ہو رہی ہے، تاکہ جنگ کو طول دینے کے لیے مغرب سے مزید جدید ترین فوجی امداد حاصل کی جا سکے۔