چین میں جوتے کی فیکٹری میں آتشزدگی، 28 افراد ہلاک

چین کے جنوب مشرقی صوبے فوجیان کے صنعتی شہر جن جیانگ میں واقع جوتوں کی ایک فیکٹری میں اچانک ہولناک آگ بھڑک اٹھے کے نتیجے میں کم از کم 28 افراد جھلس کر ہلاک ہو گئے ہیں۔ بین الاقوامی میڈیا رپورٹس کے مطابق، آتشزدگی کا یہ لرزہ خیز واقعہ فیکٹری کی عمارت میں پیش آیا جہاں دیکھتے ہی دیکھتے آگ نے پوری عمارت کو اپنی لپیٹ میں لے لیا۔ ابتدائی تحقیقاتی اطلاعات کے مطابق، آگ سب سے پہلے گراؤنڈ فلور پر رکھے گئے انتہائی آتش گیر کیمیائی اور صنعتی مواد میں لگی، جس نے شدید دھویں اور تپش کے باعث فیکٹری کے اندر موجود ملازمین کو باہر نکلنے کا موقع نہ دیا اور قیمتی جانوں کا ضیاع ہوا۔

دوسری جانب، چینی صدر شی جن پنگ نے اس المناک واقعے اور جانی نقصان پر گہرے افسوس کا اظہار کرتے ہوئے متعلقہ حکام کو ہنگامی اقدامات کی ہدایت کی ہے۔ صدر شی جن پنگ نے واقعے کی شفاف انکوائری کا حکم دیتے ہوئے سخت موقف اپنایا ہے کہ صنعتی حفاظت کے اصولوں میں لاپرواہی برتنے اور اس قیمتی جانی نقصان کے ذمہ دار عناصر کو کسی صورت معاف نہیں کیا جائے گا اور انہیں قانون کے مطابق سخت ترین سزا کا جوابدہ ٹھہرایا جائے گا۔ فائر فائٹرز اور ریسکیو ٹیموں نے طویل جدوجہد کے بعد آگ پر قابو پا لیا ہے اور عمارت میں کولنگ کا عمل جاری ہے