ڈاکٹر ازقا مس سپرانیشنل پاکستان منتخب، پولینڈ میں ملک کی نمائندگی کریں گی

برطانیہ میں مقیم پاکستانی نژاد میڈیکل ڈاکٹر ازقا سہیل کو باضابطہ طور پر ‘مس سپرانیشنل پاکستان 2026’ منتخب کر لیا گیا ہے۔ وہ پولینڈ میں منعقد ہونے والے دنیا کے پانچ بڑے عالمی بیوٹی پیجنٹس میں شمار کیے جانے والے معتبر مقابلے ‘مس سپرانیشنل 2026’ میں پہلی بار پاکستان کی نمائندگی کا اعزاز حاصل کریں گی۔ ڈاکٹر ازقا سہیل پیشے کے اعتبار سے ایک قابل میڈیکل ڈاکٹر اور ایسٹھیٹک پریکٹیشنر (Aesthetic Practitioner) ہیں، جو طب کے شعبے کے ساتھ ساتھ خواتین کو بااختیار بنانے کے لیے لندن کی معروف فلاحی تنظیم ‘اڈانا’ کے بورڈ ممبر کے طور پر سماجی خدمات بھی انجام دے رہی ہیں۔

اپنی کامیابی پر گفتگو کرتے ہوئے ڈاکٹر ازقا سہیل نے اپنی والدہ کو اپنا سب سے بڑا حوصلہ قرار دیا۔ انہوں نے بتایا کہ ان کی والدہ کا تعلق پنجاب کے شہر ملکوال کے ایک چھوٹے سے گاؤں سے تھا، جنہوں نے اپنی محنت اور عزم کی بدولت برطانیہ میں کالج پرنسپل کا باوقار منصب حاصل کیا۔ مس پاکستان آرگنائزیشن کی صدر سونیا احمد نے ڈاکٹر ازقا سہیل کو اس اعزاز پر مبارکباد پیش کرتے ہوئے بتایا کہ وہ اس عالمی اسٹیج پر پاکستان کی نمائندگی کرنے والی تیسری امیدوار ہیں۔ انہوں نے امید ظاہر کی کہ ڈاکٹر ازقا اپنی شاندار شخصیت، اعلیٰ تعلیم اور روایتی اقدار کے ذریعے پولینڈ میں ملکی ثقافت کا مثبت چہرہ دنیا کے سامنے پیش کر کے نمایاں کامیابی حاصل کریں گی۔