اردن کا ایران کی جانب سے داغے گئے 8 میزائل تباہ کرنے کا دعویٰ

اردن کی مسلح افواج نے اعلان کیا ہے کہ ملک کے فضائی دفاعی نظام (ایئر ڈیفنس سسٹم) نے اردنی حدود میں داخل ہونے والے ایران کی جانب سے داغے گئے 8 میزائلوں کو فضا ہی میں کامیابی سے تباہ کر دیا ہے، جبکہ ان میزائلوں کے گرنے والے ملبے سے کسی جانی یا مالی نقصان کی اطلاع نہیں ملی۔ سرکاری خبر رساں ایجنسی کے مطابق، ایرانی میزائلوں کے اردن کی فضائی حدود میں داخل ہوتے ہی ملک بھر میں ہنگامی حالت نافذ کرتے ہوئے فضائی حملے کے خطرے کے سائرن بجا دیے گئے تھے۔ اردنی حکومت کے ترجمان ڈاکٹر محمد حسین المومنی نے میڈیا کو بتایا کہ ان میزائلوں کو بروقت کارروائی کر کے ناکارہ بنایا گیا، انہوں نے واضح کیا کہ اردن کی مسلح افواج ملک کی خود مختاری اور شہریوں کے تحفظ کو یقینی بنانے کے لیے مکمل ہائی الرٹ ہیں۔

دوسری جانب، خبر رساں ادارے ‘روئٹرز’ کے مطابق، ایرانی میڈیا نے دعویٰ کیا تھا کہ ان میزائلوں کے ذریعے اردن میں موجود ایک امریکی فوجی اڈے کو نشانہ بنایا گیا ہے، تاہم واشنگٹن کی جانب سے اس دعوے پر تاحال کوئی باضابطہ ردعمل سامنے نہیں آیا ہے۔ اردنی حکومت کے ترجمان نے عوام پر زور دیا ہے کہ وہ خطے کی اس حساس صورتحال میں صرف سرکاری ذرائع سے جاری ہونے والی مصدقہ معلومات پر ہی اعتماد کریں اور جھوٹی خبروں یا افواہوں کے پھیلاؤ سے گریز کرتے ہوئے دفاعی اداروں کی ہدایات پر سختی سے عمل کریں۔