امریکی حملے میں چین ایران ریلوے کوریڈور کا اہم پل متاثر، ٹرین سروس معطل

ایران کے شمالی صوبے گلستان میں چین-ایران ریلوے کوریڈور کا ایک انتہائی اہم اور تزویراتی ریلوے پل امریکی حملے کا نشانہ بن گیا ہے، جس سے خطے میں جاری فوجی کشیدگی میں مزید سنگین اضافہ ہو گیا ہے۔ رپورٹس کے مطابق، گزشتہ رات ‘عق تاقہ خان’ ریلوے پل پر امریکی فضائی کارروائی کی گئی؛ یہ اہم ترین ریلوے راستہ ترکمانستان اور قازقستان کے ذریعے چین کو ایران سے ملاتا ہے، جبکہ روس بھی سال 2025ء کے آخر سے اس روٹ کو ایران کے لیے اپنے تجارتی کارگو کی ترسیل کے لیے استعمال کر رہا تھا۔ امریکی حملے کے نتیجے میں ریلوے لائن کے کچھ حصے شدید متاثر ہوئے ہیں، جس کے بعد تہران سے مشہد جانے والی ٹرین سروس کو فوری طور پر معطل کر دیا گیا ہے۔ ایرانی محکمۂ ریلوے کے مطابق، تکنیکی عملے کو مرمت کے لیے متاثرہ مقام پر روانہ کر دیا گیا ہے اور مسافروں کی منتقلی کے لیے متبادل بس سروس کا انتظام کیا جا رہا ہے۔

دوسری جانب، ایران نے اپنے جنوبی صوبوں پر امریکی بمباری اور مشرق میں دو ریلوے پلوں کو نشانہ بنانے کی سخت ترین الفاظ میں مذمت کرتے ہوئے ان کارروائیوں کو ‘جنگی جرم’ قرار دیا ہے۔ ایرانی وزارتِ خارجہ کی جانب سے جاری کردہ ایک تند و تیز بیان میں کہا گیا ہے کہ یہ امریکی حملے اقوامِ متحدہ کے منشور اور مفاہمت کی یادداشت کے آرٹیکل 1 اور 5 کی کھلی خلاف ورزی ہیں، اور امریکہ ان حملوں کے ذریعے اپنی ناکامیوں پر پردہ ڈالنے کے بہانے تلاش کر رہا ہے۔ ایرانی حکام نے واضح کیا کہ تہران امریکہ کو کسی صورت اپنی غنڈہ گردی برقرار رکھنے اور ایرانی قومی مفادات پر اثر انداز ہونے کی اجازت نہیں دے گا، اور ایران اپنی قومی خود مختاری، دفاع اور جارحیت کرنے والوں کو بھرپور سزا دینے کے لیے مکمل طور پر پُرعزم ہے