سال کا آخری سپر مون کب دکھائی دے گا؟ اسپارکو نے تفصیلات جاری کر دیں

کراچی: پاکستان اسپیس اینڈ اپر ایٹموسفیئر ریسرچ کمیشن (اسپارکو) نے اعلان کیا ہے کہ سال 2025 کا آخری سپر مون جسے دسمبر کا کولڈ مون بھی کہا جاتا ہے 4 اور 5 دسمبر کی رات پاکستان بھر میں واضح طور پر دیکھا جا سکے گا۔

اسپارکو کے مطابق سپر مون اس وقت بنتا ہے جب چاند اپنے بیضوی مدار میں زمین کے سب سے قریب مقام پیریجی پر موجود ہو اور اسی وقت پورا روشن ہو، اس قربت کے باعث چاند عام فل مون کے مقابلے میں بڑا اور زیادہ روشن دکھائی دیتا ہے۔

دسمبر کا کولڈ مون رواں سال کا تیسرا مسلسل سپر مون اور 2025 کا آخری سپر مون ہوگا۔ یہ 5 دسمبر کی صبح 04:15 PST پر 99.8% روشن حالت میں اپنے عروج پر پہنچے گا، جبکہ پاکستان میں 4 دسمبر کی شام 16:58 PST پر 99.2% روشن حالت میں طلوع ہوگا جس کی بدولت شائقین اسے دونوں راتیں واضح طور پر دیکھ سکیں گے۔

اعدادوشمار کے مطابق 5 نومبر کے سپر مون کے دوران زمین اور چاند کا فاصلہ 356,978 کلومیٹر تھا، جبکہ دسمبر کے سپر مون کے وقت یہ فاصلہ 357,218 کلومیٹر ہوگا۔ فرق معمولی ہونے کے باوجود چاند عام مکمل چاند کے مقابلے میں تقریباً 7.9% بڑا اور 15% زیادہ روشن نظر آئے گا۔

ماہرین کے مطابق سپر مون سال میں عام طور پر تین سے چار بار رونما ہوتا ہے، جبکہ کچھ برسوں میں اس تعداد میں اضافہ بھی ممکن ہوتا ہے۔ اگرچہ سائز کا فرق ننگی آنکھ سے مکمل طور پر محسوس نہیں ہوتا، لیکن انتہائی قریب سپر مون سائنسی اور مشاہداتی دونوں حوالوں سے اہم سمجھا جاتا ہے۔

اسپارکو نے عوام، طلباء اور فلکیات کے شوقین افراد کو اس قدرتی منظر کے مشاہدے کی ترغیب دیتے ہوئے کہا ہے کہ اس کے لیے کسی خاص آلے کی ضرورت نہیں، صاف موسم میں یہ منظر کھلی آنکھ سے بھی باآسانی دیکھا جا سکتا ہے۔